එළඹෙන 11 වැනි ජාතික බාලදක්ෂ ජැම්බරියට අදාළ මෙහෙයුම් කටයුතු විධිමත් කිරීමේ අරමුණින්, ශ්‍රී ලංකා පොලිස් දෙපාර්තමේන්තුවේ නියෝජ්‍ය පොලිස්පති ජගත් සේරම් මහතා ප්‍රමුඛ ජ්‍යෙෂ්ඨ පොලිස් නිලධාරීන් සහ ශ්‍රී ලංකා බාලදක්ෂ සංගමයේ ප්‍රධාන කොමසාරිස්, නීතිඥ මනෝජ් නානායක්කාර මහතා ඇතුළු ජැම්බරි සංවිධායක මණ්ඩලයේ ප්‍රධාන කමිටු නායකයන් අතර විශේෂ සාකච්ඡාවක් ඉකුත් සැප්තැම්බර් 10 දින පවත්වන ලදී.
ශ්‍රී ලංකා බාලදක්ෂ සංගමයේ ප්‍රධාන ශ්‍රවණාගාර පරිශ්‍රයේ දී පවත්වන ලද මෙම හමුව සඳහා දෙපාර්ශ්වය නියෝජනය කරමින් ප්‍රධාන පෙළේ නිලධාරීන් රැසක් සහභාගී වූ අතර, එහි ශ්‍රී ලංකා බාලදක්ෂ සංගමය සහ ශ්‍රී ලංකා පොලිස් දෙපාර්තමේන්තුව අතර ඒකාබද්ධ වැඩපිළිවෙළ පිළිබඳව පුළුල් ලෙස හා දීර්ඝ වශයෙන් සාකච්ඡා කරන ලදී.
