ශ්‍රී ලංකා බාලදක්ෂ සංගමයේ ජාතික පුහුණු කිරීමේ මණ්ඩලය විසින් සංවිධානය කරන ලද තෙවන පාගමන් පාඨමාලාව මීරිගම ලී දසනායක බාලදක්ෂ පුහුණු මාධ්‍යස්ථානයේදී සැප්තැම්බර් 18 වැනි දින සිට 20 වැනි දින දක්වා සාර්ථකව පවත්වන ලදී.
දිවයින පුරා පිහිටි විවිධ බාලදක්ෂ දිසා නියෝජනය කරමින් බාලදක්ෂ නායකයන් 45 දෙනෙක් මේ සඳහා සහභාගී වූහ.
ශ්‍රී ලංකා බාලදක්ෂ සංගමයේ ප්‍රධාන කොමසාරිස් නීතිඥ මනෝජ් නානායක්කාර සහ ජාතික පුහුණු කිරීමේ කොමසාරිස්, කර්නල් පද්මලාල් (විශ්‍රාමික) පෙරේරා යන මහත්වරුන්ගේ මඟපෙන්වීම යටතේ, ජාතික පුහුණු කිරීමේ අධ්‍යක්ෂ, මූලස්ථාන කොමසාරිස් තිලක්මන් පද්මසිරි මහතා පාඨමාලා නායක ලෙස කටයුතු කළ අතර, මූලස්ථාන කොමසාරිස් සංජය පෙරේරා මහතා නියෝජ්‍ය පාඨමාලා නායකයා ලෙස කටයුතු කළේය.
දිවයිනේ බාලදක්ෂ නායකයන්ට පාගමන් පිළිබඳ විධිමත් හා තාක්ෂණික පුහුණුවක් ලබාදීම, ඔවුන්ගේ දැනුම හා කුසලතා යාවත්කාලීන කරගැනීමට සුදුසු පසුබිමක් නිර්මාණය කිරීම සහ එම දැනුමෙන් සවිබල ගැන්වුණු නායකයන් හරහා එම අත්දැකීම් ඉතා උසස් අයුරින් බාලදක්ෂ දරුවන් වෙත දායාද කිරීම මෙවැනි පාඨමාලා සංවිධානය කිරීමේ මූලික අපේක්ෂාව වේ.
